05/08/2563
สังสิคือเพิ่นแหล่ว แก้วคำอั่งเงินหนา
บ่ลำบากกายา แลนหาเงินใช้
แลดูใสผุดผ่อง ผิวพรรณอ่องต่อง
กายนวลเนียนผ่องเกลี้ยง เสียงเว้าม่วนใน
คึดเห็นหน้าอยู่ไกล้ ไอกลิ่นกระแจะหอม
ดูสดใสวัยสะออน หลอนมาหลิงล่อ
อยากพะนอเคียงน้อง ลงหนองกับพี่
สุขอิหลีแท้บักอ้าย ชายเว้าผูว่าวอน
บทบางตอนสะออนโอ้ โตบ่คล่องเคียมไค
เพียงแค่ใจมะโนนึก ผ่านวันฝันเพ้อ
หลงละเมอสุดซ่าว สาวใสสิมาหล่ำ
คนเตี้ยต่ำม้อต้อ ปานตอฮ้างกลางไฮ่นา
ช่วงนี้เป็นยุ่งๆนำนา ตัดข้าวเอาหญ้าข้าวหัวตะแล้ว เสร็จแล้ว ฝนบ่ตกมาจ้อย แล้งคัก จักสิได้เกี่ยวบ่บุ๊ ปีนี้ แนวกินมื้อนี้ หมกปลาขาวส่อย ขี้ขม กับปิ้งปลาแจ่วบอง ลวกผัก แนวกินง่ายๆแบบบ้านๆนั่นล่ะครับ
เว้าถึงปลา มันกะขี้ขมทุกตัวปลาล่ะเนาะ บ่แมนเด้ ปลาขาวส่อยนิ ขี้ขมอิหลีพี่น้อง ก่อนทำกิน ต้องแผ่ล้างออกดีๆก่อนเด้อ ต้ม ปิ้ง ทอด กะแชบเพิ่นนิ มักอยู่นำเขื่อน แม่น้ำเป็นวังลึกๆ ห้วยหนองคลองชอย บ่มีดอก อยู่กันเป็นฝูง เป็นสิบเป็นซาว พุ้นแร่ว
โฆษณา
- ดาวน์โหลดแอปพลิเคชัน
- © 2024 Blockdit
