Kids these days effect ເຫດຜົນທີ່ຜູ້ໃຫຍ່ບໍ່ເຂົ້າໃຈຄວາມຄິດຂອງເດັກສະໄໝນີ້ ແລະ ມັກຈົ່ມວ່າ “ເດັກສະໄໝນີ້…”
“ເດັກສະໄໝນີ້ ຈັ່ງແມ່ນເວົ້າບໍ່ຟັງຄວາມ”
“ນັກຮຽນສະໄໝນີ້ ບໍ່ຕັ້ງໃຈຮຽນຄືແຕ່ກ່ອນ”
“ໄວລຸ້ນດຽວນີ້ ຈັ່ງແມ່ນບໍ່ມີມາລະຍາດ” ຯລຯ
ຫຼາຍຄົນຄົງເຄີຍໄດ້ຍິນຄຳເວົ້າແບບນີ້ຈາກຜູ້ໃຫຍ່ທີ່ຮູ້ຈັກ ຫຼື ໃນໂຊຊ້ຽວມີເດຍ ລວມເຖິງຜູ້ໃຫຍ່ເອງຄົງເຄີຍເວົ້າແບບນີ້ໃຫ້ເດັກເຊັ່ນກັນ. ເຊິ່ງຄຳເວົ້າເຫຼົ່ານີ້ມີລັກສະນະປຽບທຽບລະຫວ່າງ ເດັກສະໄໝນີ້ ກັບ ສະໄໝກ່ອນ.
ເດັກສະໄໝນີ້ ບໍ່ດີເທົ່າ ຄົນຮຸ່ນກ່ອນ,ບໍ່ມີຄວາມເຄົາລົບຕໍ່ຜູ້ໃຫຍ່,ຂີ້ຄ້ານ, ບໍ່ມີຄວາມອົດທົນ,ສະໄໝກ່ອນ ລຳບາກກ່ວານີ້ຕັ້ງຫຼາຍເທົ່າ ແລະ ຍັງມັກປຽບທຽບອີກຫຼາຍໆດ້ານ (ຄົງເຄີຍໄດ້ຍິນພໍ່ແມ່ເລົ່າເລື່ອງຄວາມລຳບາກຂອງພວກເພິ່ນໃນການໄປໂຮງຮຽນໃຫ້ຟັງເນາະ).
ຄວາມຈິງ ຜູ້ໃຫຍ່ເອງ ສະໄໝທີ່ພວກເຂົາເປັນເດັກ ພວກເຂົາກໍຖືກເວົ້າໃຫ້ລັກສະນະນີ້ຄືກັນ. ແລ້ວເປັນຫຍັງຜູ້ໃຫຍ່ຍັງມາເວົ້າໃຫ້ເຮົາ? ແທນທີ່ພວກເຂົາຈະເຂົ້າໃຈ ເພາະພວກເຂົາກໍເຄີຍເປັນເດັກ.
ກ່ອນອື່ນຕ້ອງມາທຳຄວາມເຂົ້າໃຈກ່ອນວ່າ ໂລກເຮົາປ່ຽນແປງທຸກໆມື້ ເຖິງວ່າເຮົາຈະບໍ່ເຫັນການປ່ຽນແປງໃນແຕ່ລະມື້ ແຕ່ເມື່ອມອງຍ້ອນກັບໄປ ເຮົາຈະເຫັນວ່າໂລກມັນປ່ຽນໄປຫຼາຍ. ວິຖີຊີວິດຂອງຄົນແຕ່ກ່ອນກັບຄົນຍຸກປັດຈຸບັນ ແຕກຕ່າງກັນຫຼາຍ,ສະພາບເສດຖະກິດ ສັງຄົມ,ເຕັກໂນໂລຊີ,ການອຳນວຍຄວາມສະດວກໃນດ້ານຕ່າງໆ ເຮັດໃຫ້ຄວາມຄິດຂອງຄົນຮຸ່ນໃໝ່ (ໂດຍສະເພາະ ຄົນ Generation Z) ແຕກຕ່າງຈາກຄົນຮຸ່ນກ່ອນ.
ໄດ້ມີການວິໄຈເລື່ອງ “ເດັກສະໄໝນີ້” ຫຼື “Kids these days” ຂອງນັກຈິດຕະວິທະຍາ John Protzko ແລະ Jonathan Schooler ຈາກ University of California Santa Barbara ເຊິ່ງມຸ່ງເນັ້ນເພື່ອຫາຄຳຕອບວ່າ ແມ່ນຫຍັງທີ່ເຮັດໃຫ້ຜູ້ໃຫຍ່ ຄິດວ່າເດັກສະໄໝນີ້ ບໍ່ດີເທົ່າສະໄໝກ່ອນ.
ເຊິ່ງຜົນຈາກການສອບຖາມ ແລະ ສຳຫຼວດຜູ້ໃຫຍ່ລະຫວ່າງ 31-55ປີ ຈຳນວນ 3.458 ຄົນ ພາຍໃຕ້ 3 ຫົວຂໍ້ ຄື: ການເຄົາລົບຜູ້ໃຫຍ່,ຄວາມສະຫຼາດ ແລະ ຄວາມມັກໃນການອ່ານຫນັງສື ພົບວ່າ ຜູ້ໃຫຍ່ທີ່ມີຄວາມມັກໃນອຳນາດຜະເດັດການສູງ ຄິດວ່າເດັກສະໄໝນີ້ມີຄວາມເຄົາລົບຜູ້ໃຫຍ່ໜ້ອຍລົງ ຜູ້ທີ່ສະຫຼາດ ກໍຄິດວ່າເດັກສະໄໝນີ້ບໍ່ສະຫຼາດເທົ່າພວກເຂົາ ສ່ວນຜູ້ທີ່ມັກອ່ານຫນັງສື ກໍຄິດວ່າເດັກສະໄໝນີ້ບໍ່ມັກອ່ານຫນັງສື.
ຈາກການວິໄຈນີ້ John ແລະ Jonathan ກໍໄດ້ພົບວ່າ ທີ່ຜູ້ໃຫຍ່ ມີອະຄະຕິກັບເດັກສະໄໝນີ້ ເກີດຈາກສອງປັດໄຈຄື:
1.ການທີ່ຜູ້ໃຫຍ່ມີຄວາມບ່ຽງເບນທາງດ້ານຄວາມຊົງຈຳ(Memory Bias).
ຄົນເຮົາມັກຈະຄິດວ່າ ເຮົາຈົດຈຳສິ່ງທີ່ເກີດຂຶ້ນໃນອະດີດໄດ້ດີ ແຕ່ຄວາມຈິງບໍ່ແມ່ນເລີຍ.ຄວາມຊົງຈຳຂອງເຮົາມັກຈະຖືກແທນທີ່ໂດຍການເປັນຢູ່ໃນປັດຈຸບັນໂດຍບໍ່ຮູ້ຕົວ. ເຊັ່ນ ຄົນທີ່ມັກອ່ານຫນັງສືໃນຕອນນີ້ ອາດຈະຄິດວ່າຕອນທີ່ພວກເຂົາຍັງເປັນເດັກ ພວກເຂົາກໍມັກອ່ານ ເຊິ່ງມັນອາດຈະບໍ່ເປັນຄວາມຈິງ ແລ້ວພວກເຂົາອາດຈະປຽບທຽບຄວາມຊົງຈຳໃນໄວເດັກນັ້ນ ກັບ ເດັກໃນປັດຈຸບັນແລ້ວຄິດວ່າເດັກສະໄໝນີ້ ບໍ່ດີເທົ່າພວກເຂົາ.
2.ການທີ່ຜູ້ໃຫຍ່ຄິດວ່າຄົນອື່ນບໍ່ດີເທົ່າພວກເຂົາໃນສິ່ງທີ່ພວກເຂົາເຮັດໄດ້ດີ.
ຜູ້ໃຫຍ່ບາງຄົນມັກຈະປຽບທຽບດ້ານດີຂອງຄົນເອງ ກັບຄົນອື່ນໂດຍສະເພາະ ກັບຄົນທີ່ບໍ່ເກັ່ງເທົ່າພວກເຂົາ ເພື່ອເຮັດໃຫ້ຕົນເອງຮູ້ສຶກດີ ຮູ້ສຶກວ່າເໜືອກວ່າ,ພວກເຂົາຈະເຊື່ອວ່າຕົນເອງເກັ່ງກວ່າ ແລະ ປະຕິເສດທີ່ຈະຍອມຮັບວ່າຄົນອື່ນກໍມີດີໃນດ້ານອື່ນ ພຽງແຕ່ເຮັດບໍ່ໄດ້ດີໃນສິ່ງທີ່ພວກເຂົາເຮັດໄດ້ດີ.ຍົກຕົວຢ່າງເຊັ່ນ ຜູ່ໃຫຍ່ທີ່ມີລະດັບສະຕິປັນຍາສູງ ມີແນວໂນ້ມທີ່ຈະຄິດວ່າ ຄົນອື່ນສະຫຼາດໜ້ອຍກວ່າພວກເຂົາ ເຖິງຈະເປັນຜູ້ໃຫຍ່ດ້ວຍກັນ ຫຼື ເດັກກໍຕາມ.
ສະຫຼຸບກໍຄື ຜູ້ໃຫຍ່ສະໄໝນີ້ເອງກໍເຄີຍເປັນເດັກທີ່ຖືກເວົ້າໃຫ້ຄືກັນ ແລະ ຜູ້ໃຫຍ່ໃນອະນາຄົດກໍຄືເດັກສະໄໝນີ້ ກໍຈະເຫັນເດັກໃນວັນຂ້າງຫນ້າ ຄືກັບທີ່ຜູ້ໃຫຍ່ເຫັນເຮົາໃນປັດຈຸບັນ.ແຕ່ເຖິງຢ່າງໃດກໍຕາມເຮົາກໍຕ້ອງກັບມາໄຕ່ຕອງຄວາມຄິດ ແລະ ຄວາມຊົງຈຳຂອງເຮົາກັນໃໝ່ ເພື່ອລະມັດລະວັງ ແລະ ຫຼີກລ່ຽງຄຳເວົ້າທີ່ສະແດງເຖິງອະຄະຕິທີ່ມີຕໍ່ເດັກ ເພາະເຮົາກໍຄົງບໍ່ຢາກໃຫ້ຄຳເວົ້າບໍ່ດີເຫຼົ່ານັ້ນເປັນແຜໃນໃຈຂອງເດັກ ຄືກັບທີ່ເຮົາເຄີຍເປັນ.
ທີ່ມາ: The ‘kids these days’ effect – THE STANDARD" https://thestandard.co/the-kids-these-days-effect/
"The 'kids these days' effect -- or why people disparage younger generations" https://www.zmescience.com/science/psychology-science/the-kids-these-days-effect-or-why-people-disparage-younger-generations/amp/
โฆษณา
- ดาวน์โหลดแอปพลิเคชัน
- © 2025 Blockdit
